Eph 5 | NdeIBE | STEP | Ngakho wobani ngabalingiseli baka-Nkulunkulu, njengabantwana abathandwa kakhulu

Ephesians 5

1 Ngakho wobani ngabalingiseli baka-Nkulunkulu, njengabantwana abathandwa kakhulu 2 liphile impilo yothando, njengalokhu uKhristu wasithanda wazinikela ngenxa yethu njengomnikelo olephunga elimnandi lomhlatshelo kaNkulunkulu.

3 Kodwa phakathi kwenu akungabi khona lokuncane ukuxhwala kobufebe, loba yikuphi ukungcola, loba okobuhwaba, ngoba lezizinto kazifanelanga ebantwini abangcwele bakaNkulunkulu. 4 Njalo akumelanga kube lenhlamba, lenkulumo zobuthutha loba ubuphoxo, okuyizinto ezingafanelanga, kodwa kakube lokubonga. 5 Ngoba kuliqiniso ukuthi: Akulamuntu oyisixhwali, longcolileyo loba oyisihwaba – umuntu onjalo ukhonza izithombe – olelifa embusweni kaKhristu lokaNkulunkulu.

6 Lingavumi ukukhohliswa ngumuntu ngamazwi ayize, ngoba ngenxa yezinto ezinje ulaka luka-Nkulunkulu lwehlela phezu kwalabo abangalaleliyo. 7 Ngakho lingahlanganyeli labo.

8 Ngoba lake laba ngumnyama, kodwa khathesi seliyikukhanya eNkosini. Philani njengabantwana bokukhanya 9 (ngoba izithelo zokukhanya zikhona kubo bonke ubuhle, lokulunga kanye leqiniso) 10 lidinge okuthokozisa iNkosi. 11 Lingahlanganyeli ezenzweni zobumnyama ezingelazithelo, kodwa lizihlazulule. 12 Ngoba kulihlazo lokukutsho okwenziwa yizigangi ensitha. 13 Kodwa konke okuvezwe obala yikukhanya kuyabonakala,

14 ngoba yikukhanya okwenza izinto zonke zibonakale. Yikho nje kuthiwa: “Phaphama, wena oleleyo vuka kwabafileyo, uKhristu uzakhanya kuwe.”

15 Ngakho-ke qaphelani kakhulu ukuba liphila njani – kungabi njengezithutha kodwa njengabahlakaniphileyo, 16 liwasebenzise ngokupheleleyo amathuba wonke, ngoba izinsuku zimbi. 17 Ngakho lingabi yiziwula, kodwa qedisisani ukuthi intando kaNkulunkulu iyini. 18 Lingadakwa liwayini, okuletha ukonakala. Kodwa gcwaliswani ngoMoya.

19 Khulumisanani ngamahubo, lamaculo kanye langezingoma zokomoya. Hlabelani lenzele iNkosi imiculo ezinhliziyweni zenu, 20 limbonge kokuphela uNkulunkulu uBaba ngenxa yezinto zonke, ngebizo leNkosi yethu uJesu Khristu.

21 Zehliseleni phansi omunye komunye lihlonipha uKhristu.

Abesifazana Labomkabo

22 Bafazi zehliseleni phansi kwabomkenu njengaseNkosini. 23 Ngoba indoda iyinhloko yomfazi njengoKhristu eyinhloko yebandla, elingumzimba wakhe, yena onguMsilisi walo.

24 Ngakho njengebandla lizehlisela phansi kuKhristu, ngokunjalo abesifazana kumele bazehlisele phansi kubomkabo ezintweni zonke.

25 Madoda, thandani omkenu, njengo-Khristu owathanda ibandla wazinikela ngenxa yalo 26 ukuba alenze libe ngcwele, elihlambulula ngokuligezisa ngamanzi ngokusebenzisa ilizwi,

27 kanye lokulethula kuye njengebandla elilenkazimulo, elingelachatha loba umxhele loba esinye nje isici, kodwa lingcwele njalo lingelacala. 28 Ngayonale indlela, amadoda kumele abathande omkawo njengemizimba yawo. Lowo othanda umfazi wakhe uyazithanda. 29 Belo, kakho owake wazonda umzimba wakhe, kodwa uwunika ukudla awulondoloze, njengokwenziwa nguKhristu ebandleni – 30 ngoba thina siyizitho zomzimba wakhe. 31 “Ngenxa yalokhu indoda izatshiya uyise lonina ihlanganiswe lomkayo, njalo ababili laba bazakuba nyamanye.” 32 Le yimfihlakalo enkulu – kodwa mina ngikhuluma ngoKhristu lebandla. 33 Kodwa omunye lomunye wenu laye kathande umkakhe njengoba ezithanda, lomfazi kumele ahloniphe indoda yakhe.